Djemtë tajlandezë që u evakuan nga shpella e përmbytur në një mision të vështirë shpëtimi, dhe morën vëmendjen e botës, kanë folur për herë të parë. Të rinjtë dhe trajneri i ekipit të tyre të futbollit Wild Boar kanë falënderuar ekipin e zhytësve, që i shpëtuan.
Duke folur nga shtretërit e tyre në spital, djemtë e moshës nga 11 deri në 16 vjeç, thanë se ishin në gjendje të mirë shëndetësore. Ndërkohë regjisoret e Hollivudit janë duke u përgatitur për të bërë një film të bazuar në sagën magjepsëse.
“Faleminderit që më shpëtuat mua, unë jam në gjendje të mirë shëndetësore”, jështu është shprehur Prajak Sutham, njëri nga djemtë. Ndërsa djali që mori vëmendje të veçantë Adul Sam-on, i cili fliste anglisht me zhytësit britanikë, Rick Stanton dhe John Volanthen, të cilët zbuluan djemtë e bllokuar, gjithashtu po merr ndihmë mjekësorë në spitalin Chiang Rai Prachanukroh. Ai tha: “Unë jam shumë mirë. Faleminderit shumë”.
12 djemtë dhe trajneri i tyre do të lënë spitalin në fund të javës së ardhshme, njoftoi ministri i Shëndetësisë së Tajlandës Piyasakol Sakolsatayadorn. Por ministri urdhëroi djemtë, prindërit e tyre dhe anëtarët e tjerë të familjes që të mos japin intervista mediave duke pretenduar se raportimet mund të ketë një ndikim negativ në shëndetin e tyre mendor. Piyasakol tha: “Ne kemi këshilluar të gjithë pacientët dhe prindërit e tyre që të shmangin të gjitha ekspozimet në media, sepse ata mund të stresohen”.
