Kualifikimi dramatik i Anglisë për në fazën çerekfinale të Botërorit, theu edhe një tabu futbollistike. Ishte hera e parë që anglezët fitonin një ndeshje pas ekzekutimit të 11-metërshave dhe kjo është festuar gjatë nga tifozët.
Edhe pse “Tre Luanët” e Gareth Southgate nuk treguan një futboll dominues dhe pasi kaluan në avantazh u përpoqën të mbrojnë rezultatin, pasi firmosën kualifikimin të gjitha u harruan.
Tifozët anglezë të mbledhur në sheshe për të ndjekur kombëtaren e tyre, e kanë përjetuar me shumë emocion zhvillimin e saj. Harry Kane bëri që në Londër e në të gjitha qytetet angleze, me mijëra e mijëra persona të shpërthejnë në festë.
Gjithçka po shkonte për mrekulli për Anglinë, deri në momentin kur Kolumbia barazoi me Yerri Minën, duke ngrirë festën e tifozëve anglezë. Kohët shtesë i mbajtën të gjithë në ankth, ndërsa kulmin e patën në momentin e ekzekutimit të 11-metërshave. Kjo ishte frika më e madhe e të gjithë anglezëve, por në fund fati ishte me ta.
Uribe dhe Bacca gabuan për ekipin amerikano-latin, duke u dhënë mundësinë anglezëve të shpërthejnë zyrtarisht në festë.
