Një ndër tenderat më të kritikuar dhe një nga argumentet me të forta të opozitës gjatë katërvjeçarit të shkuar të qeverisë Rama, por edhe gjatë fushatës elektorale që lamë pas, ka qenë ai i palmave.
Mirëpo, si për ironi të fatit, gjatë këtyre ditëve të ngrohta të gushtit, madhështia e palmave të vendosur në hyrje të qytetit të Durrësit duket se ka rënë.
Ashtu siç vërehet edhe në videon mëposhtme, pas vendosjes së tyre në këtë segment rrugor para dy vitesh, ka munguar përkujdesja me medikamente mbrojtëse dhe ujitja e tyre.
Sipas raportimeve të medieve vendase, mësohet se çmimi i një palme gjatë tenderimit ka qenë afro 300 euro për copë.
Nga ana tjetër, ende nuk ka një prononcim zyrtar nga Bashkia e Durrësit lidhur me gjendjen e degraduar të pemëve.
Sakaq, e heshtur duket shoqëria civile dhe ambjentalistët e vendit për shpërdorimin e taksave dhe hapësirës së gjelbër.
