Në Kosovë ekziston një burg, i cili cilësohet si “i lehtë”, për shkak se nuk ka roje sigurie. Bëhet fjalë për burgun e Smrekonicës në Vushtrri, ku të burgosurit kanë kushte relativisht të mira: dhoma e tyre përmban një shtrat, një televizor, mjete për pastrimin e dhomës dhe një tavolinë. Kapaciteti i këtij burgu është për 200 të burgosur.
Drejtori i Burgut të Smrekonicës, Xhevdet Maqastena tregon për Kallxo.com se nuk e ndjejnë mungesën e rojeve të armatosura në burgun që ai e drejton.
“Ideja e këtij burgu është kështu, këtu janë të dënuarit me sjelljet jashtëzakonisht të mira, me benificione, me privilegje dhe vetëdija e të dënuarit është që pse t’i humb këto benificione e të kthehet në burgje të mbyllura e ti humb të gjitha këto benificione,” tregon ai.
Po ashtu, Maqastena shprehet se të gjithë të dënuarit në Burgun e Smrekonicës punojnë punë të ndryshme, duke filluar nga punët e pastrimit të oborrit, në kuzhinë, dhe në një hapësire prej 5 hektarësh ku mbjellin pemë e perime.
“Të dënuarit kanë nga katër vizita në muaj gjatë ditëve të vikendit, mirëpo shumë shpesh ndodh që të dënuarit bëjnë kërkesa ekstra dhe institucioni u lejon në bazë sjelljes së tyre të mirë”, thotë drejtori.
Edhe pjesa e palestrës është e rregulluar brenda hapësirave të burgut, ndërsa nuk lihet anash edhe dhoma ku të dënuarit kryejnë ritualet fetare.
