Këtë të hënë SPAK zbarkoi në ambientet e Bashkisë së Kukësit ku dhe bëri sekuestrimin e kamerave të sigurisë, si dhe një sërë dokumentesh të ndryshme, në kuadër të hetimit që po kryhet për shpërdorim detyre ndaj ish-kryetarit të Bashkisë, Safet Gjici.
Burime për mediat bëjnë me dije se oficerët e Byrosë Kombëtare të Hetimit qëndruan për rreth gjysëm ore në Bashki dhe më pas bënë të mundur sekuestrimin e serverit të kamerave të sigurimit. Kjo me qëllim për të verifikuar hyrje daljet në institucion të gruas që shfaqet në video intime me Gjicin, si dhe personat që mund të kenë patur kontakt me të.
Gjithashtu, SPAK i ka ndaluar gruas së shfaqur në videon intime me Safet Gjicin, Alma K, daljen e saj jashtë vendit, për sa kohë që rrëfimi i saj është kyç për hetimin.
Kujtojmë që kryebashkiaku i Kukësit Safet Gjici ka dhënë dorëheqjen pas publikimit të videos erotike, e filmuar teksa kryen marrëdhënie seksuale me vajzën e identifikuar Alma K në zyrën e Bashkisë Kukës. Ai tha se filmimi është një kurth i ngritur nga kundërshtarët e tij politikë në zgjedhjet e 14 majit.
Safet Gjici, i cili vetëm pak javë më parë fitoi mandatin e dytë si kryebashkiak i Kukësit, tha se me vajzën në fjalë, ka një marrëdhënie intime prej disa kohësh.
