Formula 1 është kthyer më shumë në një garë mes Ferrarit dhe Mercedes, pasi skuderitë e tjera nuk janë në nivel për ti luftuar. Këtë fundjavë do të zhvillohet edhe gara për Çmimin e Madh të Belgjikës dhe Sebastian Vette do të kërkojë patjetër fitoren për të mos lejuar një shkëputje të Lewis Hamilton, pasi momentalisht piloti britanik mban vendin e parë.
Piloti gjerman është shpallur katër herë kampion bote, por asnjëherë me Ferrarin dhe për këtë arsye ai do ta tentojë këtë vit, pasi ka në dispozicion edhe një makinë mjaft të mirë. Vitin që lamë pas Vettel iu afrua shumë shpalljes kampion, por në garat e fundit Hamilton përmbys gjithçka.
“Unë shpresoj që te Ferrari të arrij të bëj të paktën një pjesë të rrugëtimit që ka bërë Michael Schumacher, që për mua dhe skuadrën do të ishte një sukses i madh. Por sot kohët kanë ndryshuar, ndaj na duhet të shohim përpara, të ardhmen. Unë dua të jem pjesë e skuadrës, ta ndihmoj atë të fitojë, të ndihmoj Ferrarin të shpallet kampion. Çdo garë është ndryshe nga tjetra, ndaj duhet t’i besosh përvojës, instiktit dhe situatës, duke reaguar “in ekstremis”, tha Vettel.
“Kur zbarkova në Formula 1 nuk e dija se do të bëjë një karrierë të tillë. Pasi kalojnë disa vite dhe fiton disa gara kupton se ke një karrierë, ndërkohë që më parë nuk më pëlqente që ta quaja kështu punën time në pistë”, tha Vettel.
