Vettel: Dua të fitoj titullin me Ferrarin

Sebastian Vettel pati një start të mrekullueshëm në sezonin që lamë pas në Formula 1, duke u renditur i pari deri në muajin shtator. Por më pas Ferrari tregoi një rënie dhe nuk ishte më në gjendje të konkurronte rivalët e Mercedes, ku në fund Hamilton u shpall kampion bote për të katërtën herë. Vettel beson se skuderisë së ti i mungoi lëvizja në hapin e fundit dhe kjo bëri që ata të mos shpalleshin kampionë. “Hapi i fundit është gjithnjë më i vështiri për të fituar titullin kampion. Megjithatë, unë besoj se skuadra ka një platformë solide për të konkurruar këtë vit për titullin kampion”, deklaroi piloti gjerman i Ferrarit.

“Besoj se do të jemi mjaft kompetivë këtë sezon, por nuk duhet të përsëritim të njëjtat gabime si vjet dhe të jemi cinikë atëherë kur duhet, duke marrë maksimumin dhe përfituar nga çdo mundësi që na jepet. Unë dua të fitoj titullin me Ferrarin dhe shpresoj që deri në shkurt, kur të kryhen testet e para, gjithçka do të jetë gati për sa i përket makinës së re. Në fabrikë po punojnë për një makinë të shpejtë dhe unë kam besim te mekanikët”, tha Vettel për revistën “Autosport”, që ende nuk ka fituar një titull kampion me Ferrarin, ndërkohë që numëron 4 tituj me Red Bull, po aq sa Hamilton.