Pasi plagosi prindërit, autori së bashku me të dashurën janë vetëdorëzuar në Policinë e Durrësit. Hajri Neziri, 25-vjeç, ka qëlluar disa herë me thikë prindërit e tij, Destan Haziri, 75-vjeç dhe Hasije Neziri, 64-vjeç, duke i shkaktuar plagë të shumta. Nga të dhënat paraprake, ende jo zyrtare, dyshohet se pjesë e konfiktit të ketë qenë edhe e dashura e të riut.
Teksa kanë dëgjuar ulërima, fqinjët menjëherë kanë ndërhyrë për t’u dhënë ndihmë të moshuarve. Mes të tjerash, fqinjët pohojnë se Destan dhe Hasije Neziri njiheshin si njerëz të qetë dhe intelektualë, ndërsa thanë se nuk kishin dijeni për ndonjë konflikt në këtë familje, raporton ‘BalkanWeb’.
Ndonëse ngjarja mbetet ende e paqartë, ka dyshime se prindërit nuk ishin dakord për lidhjen e dy të rinjve. Sakaq, policia po vijon hetimet, për zbardhjen e plotë të ngjarjes.
