I kërkuar nga skuadrat më të mira të Formula 1, 19-vjeçari holandez Max Verstappen ka vendosur sot të rinovojë kontratën e tij me Red Bull, duke qëndruar me makinën austriake edhe për 3 sezone të tjera. Lajmi është konfirmuar sot nga skuadra e Red Bull, që përgatitet në Austin për garën e Çmimit të Madh të Amerikës. Verstappen, piloti më i ri në histori që ka fituar një garë të Formula 1, shpreson që të fitojë me Red Bull edhe titullin e parë kampion. Edhe pse shpesh është përfolur se ai mund të shkojë te Mercedes dhe Ferrari, që e vlerësojnë shumë si pilot dhe rival, Verstappen vendosi të qëndrojë te Red Bull që është përmirësuar ndjeshëm garat e fundit.
Makina austriake duket se i jep garanci pilotit të talentuar, që vendosi të shtyjë për 3 sezone kontratën. “Red Bull gjithnjë ka besuar tek unë, që kur isha 16 vjeç dhe më pas më afroi në Formula 1 kur isha vetëm 17 vjeç. Gjithnjë i kanë mbështetur ambicjet e mia, ndaj jam i lumtur që qëndroj sërish këtu”, tha Verstappen.
I kënaqur për këtë marrëveshje edhe shefi i makinës austriake Chris Horner, që do të ketë edhe për 3 vite pilotin më të talentuar të Formula 1. “Nga fitorja në Spanjë vitin e kaluar, Max është përmirësuar ndjeshëm. Ka qenë një kënaqësi ta drejtoja dhe këtë vit, ku fitoi në Malajzi. Kemi patur vështirësi këtë sezon, por ai është një talent, një pilot i rrallë i garave të Formula 1”, tha Horner.
