Mbyllet me sukses raporti i Komisionit për Verifikimin e mandateve. Tashmë gjithçka është gati, në orën 18:00 do të bëhet prezantimi i raportit nga kryetarja e këtij komisioni, Vasilika Hysi.
Komisioni nuk ka konstatuar asnjë parregullsi dhe se gjithçka do të jetë formale. Seanca që pritet të mbahet pas 20 minutash do të ketë një rëndësi të veçantë për faktin se në rendin e ditës parashikon betimin e deputetëve dhe zgjedhjen e kryetarit të ri të Kuvendit.
Mes të tjerash mësohet se rregullorja nuk parashikon të ketë debate, por dy partitë kryesore, PD dhe LSI do të shprehin kontestime përmes votës kundër Ruçit. Duhet përmendur fakti se me rëndësi janë edhe zhvillimet jashtë oborrit të Kuvendit, pasi ish-të përndjekurit politikë do të mbajnë një protestë. Sakaq, ditën e hënë pritet të ketë një agjendë të ngjeshur zhvillimesh politike, pasi ka dy seanca parlamentare, një paradite dhe një pasdite, ku do të prezantohet kabinetit qeveritar “Rama 2”.
