Flamurtari ka mposhtur Kamzën me rezultatin e ngushtë 1-0 në Vlorë dhe ka hipotekuar 3 pikë mjaft të vlefshme në javën e 17-të të Superligës. Ishte kapiteni Tomislav Bushic autori i golit që vendosi fatin e takimit.
Trajneri Daja pati mundësinë të hidhte në fushë futbollistët më të mirë të organikës së tij, ndërsa Gjoka propozoi një mbrojtje “të arnuar” për shkak të disa mungesave në këtë repart. Pjesa e parë u zhvilluar thuajse tërësisht në gjysmëfushën e Kamzës, teksa vlonjatët i shkuan disa herë pranë golit, por pa arritur të thyejnë portierin Avdyli.
Goli erdhi vetëm në minutën e 67’ të takimit, kur sulmuesi kroat Bushiç shfrytëzoi maksimalisht një krosim të ardhur nga këndi nga Cale dhe pas një gjuajtjeje të saktë me kokë, çoi topin në rrjetën e portës së Ilir Avdylit.
Kamza tentoi të reagojë në minutat e fundit, duke u afruar disa herë në zonën e portës së Koliçit, por njëkohësisht la edhe hapësira, duke rrezikuar të pësonte edhe golin e dytë, veçanërisht në minutën e 90’, kur Alesio Hyseni shpërdoroi vetëm 5 metra larg portës së miqve.
Kjo ishte fitorja e dytë radhazi për vlonjatët, që ashtu si ndaj Laçit, triumfuan me shifrat 1-0 dhe tashmë mbeten në vendin e 6, por me 28 pikë të grumbulluara. Nga ana tjetër Kamza nuk arriti t’u japë vazhdimësi dy javëve radhazi pa humbje, duke mbetur në vendin e parafundit, në kuotën e 12 pikëve, pas plot 17 javëve.
