Analisti Ben Andoni, i ftuar në një intervistë televizive, e ka konsideruar një precedent të dëmshëm dhe veprim të panevojshëm nga PD, vendimin për t’u ngujuar në seli dhe për të mos lejuar arrestimin e Ervin Salianjit. Andoni mendon që Salianji është përdorur nga PD, dhe te vet ai ka një zhgënjim. Analisti e konsideron qëndrimin e deputetit Salianji si të kthjellët, ndërsa reagimin e PS dhe PD, si absurd dhe mungesë respekti për drejtësinë.
“Personalisht më është dukur absurde, qoftë në deklaratat e z.Bardhi dhe z.Rama. Këto parti s’kanë as respektin më të vogël për drejtësinë. Vendimi ka qenë i formës së prerë. Nga gjërat që po shikojmë tashmë shikohet që faktet përkojnë me ato që gjykata ka ngritur vendimin e vet. Nga PS dhe PD, duhet të ishin të kujdesshme që të parqiteshin me më shumë respekt. Më i kthjellëti në këto momente duket z.Salianji, që e ka konfirmuar situatën e tij. PD të jetë ndihmë dhe jo pengesë për drejtësinë. Më bën përshtypje që kjo lloj ashpërsie e këtyre ditëve ka sfumuar një nga ngjarjet më të mëdha që është hapja e kapitullit të parë të negociatave. PD nëse do ishte një cik më serioze duhet të alarmohej kur Parlamenti s’mori përsipër të respektonte vendimin e Kushtetueses për mandatin e Xhaçkës. Të gjithë këtë veprimtari që po bëjnë për z.Salianji u takonte ta bënin për atë gjë. Pas 24 orësh apo 48 orësh çështja e z.Salianji do mbyllet dhe Shqipëria do ketë ngjarjen e re si apetit për publikun dhe ato përplasjet e palëve me njëra-tjetrën.
Z.Salianji ka një zhgënjim të madh. Është një nga njerëzit më aktiv të PD-së, me të cilin PD ka marrë fitore. Është përdorur pak më shumë se sa duhet nga PD. Salianji ka qenë në terren dhe kudo ku ka qenë ka qenë efikas. Ky është zhgënjimi më i madh për të, sepse ndihma morale është e pamjaftueshme. Për policinë është e vështirë të ndërhyjë në një institucion partiak, po vështirësojnë diçka që është e panevojshme, dhe po vendosin një precedent është i dëmshëm për ta në radhë të parë nesër. Është rasti i dytë me z.Salianji, që ata i bëjnë karshillëk policisë. Besoj që Salianji do ndjekë rrugën logjike për t’u paraqitur në polici. Do ketë lehtësira dhe do t’i kthehet jetës publike shumë shpejt. Mendoj që për z.Salianji ka pasur dëmtim të madh sepse gjyqi është shtyrë 4 vjet”.
Sa i takon çështjes së Salianjit, Andoni është i mendimit se “qoftë edhe për procedurë duhej të ndiqej edhe logjika e Komisionit të Mandateve”. Duke u ndalur te thirrja për protesta, Andoni thekson se interesi i njerëzve ka rënë, duke shtuar se duhet gjetur kauzat e duhur për protesta të cilat lidhen me jetën e qytetarëve. Sipas tij PD është ende e paqartë, apatike, dhe nuk ka parashtuar një alternativë para shqiptarëve.
