Motra e Leo Sadikut, ka shprehur dhimbjen në protestën e organizuar përpara Ministrisë së Shëndetësisë, duke akuzuar mjekët dhe sistemin shëndetësor për vdekjen e vëllait të saj.
Ajo theksoi se mjekësia shqiptare është në një gjendje të degraduar dhe akuzoi mjekët e QSUT se e lanë vëllanë të vdesë duke mos i bërë asnjë ekzaminim të nevojshëm, si një eko zemre, një skaner ose matje tensioni.
“Mjekësia shqiptare më vrau vëllanë,” tha motra, duke shtuar se ata nuk ishin kujdesur siç duhej për pacientin dhe se pretendimet e mjekëve për trajtimin ishin të rreme. Ajo i bëri thirrje autoriteteve për drejtësi, duke ngritur pyetjen se sa fëmijë të tjerë do të humbasin jetën për shkak të sistemit shëndetësor të pasigurt. “Prokuroria hesht dhe prindërit e mi vetëm qajnë,” tha ajo, ndërsa kërkoi ndihmën e autoriteteve për të bërë drejtësi për vëllanë e saj.
Motra e Leo Sadikut: Vëllai im ndërroi jetë, teksa disa mjekë nuk dinin të bënin punën. Mjekësia shqiptare më vrau vëllanë. Ata pa pikë mëshire vendosën ta vrisnin. QSUT nuk i bëri asnjë ekzaminim, ata dalin me pretendime të rreme. Ata nuk i kanë bërë një eko zemre, një skaner, një matje tensioni, si i bëjnë ato betime ata. Dhe sa fëmijë të tjerë do vriten si vëllai im? Prokuroria hesht dhe prindërit e mi vetëm qajnë.
