Konfliktin që ka me PD-në, Erion Veliaj ka përfituar nga rasti ta transferojë tek aktorët, të cilët janë ende të nxehur me çështjen e Teatrit. Të rinjtë demokratë nuk kanë të ndalur me “luftën” e tyre, ndaj asaj që e cilësojnë si një qeveri të korruptuar, duke lakuar emrat e Tahirit e Xhafajt.
Por edhe në rastin e sotëm, të rinjtë e Bashës nuk arritën që të shënjestronin dot Veliajn, duke dëshmuar një tjetër dështim të kësaj force, e cila tenton të bëj gjetje nga ana e saj, por këto gjetje janë thjeshtë një kopje e ripërsëritur në Kuvendin shqiptar. Këtë detaj Veliaj e përdori me mjaft mjeshtëri, duke u dhënë goditjen e radhës.
Sikundër u duk qartë falë një video-je e cila u bë virale, një person i afrohet dhe e qëllon me vezë. Veliaj mbrohet, ndërsa i riu neutralizohet menjëherë nga forcat e sigurisë.
Por kjo situatë nuk mund të kalonte kaq thjeshtë, pa marrë një koment nga vetë Veliaj. Me një sens të hollë humori, kreu i Bashkisë së Tiranës dha një përgjigje për PD-në, pas aksionit të sotëm të të rinjve të FRPD-së, që qëlluan me vezë ndaj tij. Më shumë si këshillë, Veliaj iu tha se duhet të stërviten më shumë me shënjestrën.
“Hodhët 10 vezë nuk më zuri asnjë, stërvituni pak më shumë”, tha Veliaj, teksa i drejtohej një të pranishmi në dëgjesën me artistët për Teatrin.
“Dolët huq, me atë nishan që ju çoi Luli, hodhët 10 vezë nuk më zuri asnjë. Kur e përballoj me sportivitet sulmin “alla ISIS”, pranoni me sportivitet batutën time, duhet të stërviteni më shumë”, tha Veliaj.
Incidenti ndodhi sot para dëgjesës, ku një grup të rinjsh nga FRPD-ja kanë qëlluar me vezë kryebashkiakun Erion Veliaj, të cilin e akuzojnë se po prish teatrin për të lejuar aty ngritjen e kullave.
Veliaj dhe Ministrja e Kulturës, Mirela Kumbaro, po zhvillojnë një dëgjesë me artistët, të cilët kanë kundërshtuar me forcë prishjen e Teatrit Kombëtar në Tiranë. Kjo seancë dëgjimore vjen një ditë para aksionit të paralajmëruar të komunitetit të artistëve, që pritet të kalojë në një formë tjetër të protestës, duke qëndruar 24 orë në ambientet e Teatrit Kombëtar. Për këtë, Veliaj tha se për Teatrin e Ri Kombëtar nevojiten rreth 30 milionë euro, para të cilat shteti nuk i ka dhe e tejkalojnë investimin për kulturën nga 2005 deri më 2018, prandaj është gjetur zgjidhja e Partneritetit Publik Privat.
