Prokuroria ka ngritur akuzën për tre efektivët e komisiariatit të Korçës, për mosdhënie ndihme ndaj 27-vjeçarit Enea Ftoj, i cili ndërroi jetë në ambientet e paraburgimit.
Edhe pas konkluzioneve të ekspertizës mjeko-ligjore, hetimet ende po vijojnë. “Fakti, që 27-vjeçari nuk ka vdekur nga dhuna, nuk do të thotë që policia nuk ka përgjegjësi penale për vdekjen e tij.
Ka prova, që efektivët e policisë, nuk i kanë dhënë ndihmë Enea Ftojit, edhe pse ai kishte shfaqur probleme shëndetësore gjatë dy ditëve të qëndrimit në ambientet e Komisariatit. Policia ka shkelur rregulloren e trajtimit të të shoqëruarve, dhe nuk ka kryer kontrolle periodike në qelinë e 27-vjeçarit.
Prokuroria po vlerëson të gjitha provat dhe dëshmitë e grumbulluara, dhe pritet të vërë nën akuzë, të paktën tre efektivë të Komisariatit të Korçës”.
Ngjarja
Enea Ftoji ndërroi jetë më 17 maj, në ambientet e paraburgimit të Korçës, ku kishte tre ditë që qëndronte pasi ishte ndaluar për “vjedhje me dhunë”. Ftoji ditën kur ndodhi ngjarja, duhej të dilte në sallën e gjyqit, për akuzën që rëndonte ndaj tij. Ndonëse familjarët e prisnin atë në sallën e gjyqit, ata u njoftuan për ngjarjen e rëndë. Fill pas ngjarjes, familjarët e viktimës hodhën akuza të rënda për policinë, pasi kanë dyshime se djali i tyre është dhunuar në paraburgim, që i ka shkaktuar edhe vdekjen.
Rezultati i ekspertizës: Enea Ftoj nuk vdiq nga dhuna
Instituti i Mjekësisë Ligjore, ka dalë në përfundimin se 27-vjeçari nga Korça, i cili i përkiste komunitetit rom, nuk është dhunuar dhe nuk është prekur nga policët e komisariatit.
Ndonëse në fotot e publikuara nga familjarët e Eneas, i cili është baba i tre fëmijëve të mitur, dukeshin qartë shenjat në trupin e tij, rezultati i ekspertizës thotë të kundërtën.
