Deputetja e Partisë Demokratike, Jorida Tabaku ka reaguar në lidhje me aksidentin tragjik në Gjermani ku katër punëtorë shqiptarë kanë humbur jetën pasi u rrëzuan nga skela ku po punonin.
Me anë të një postimi në llogarinë e saj në rrjetin social Facebook, Tabaku teksa ka shprehur ngushëllimet për familjarët e viktimave, shkruan se shqiptarët janë larguar nga vendi ynë pas kushteve ekstreme të varfërisë pasi nuk kanë mundësi për të siguruar një jetesë të mirë në Shqipëri.
Më tej, deputetja demokrate shkruan se shqiptarët kanë nevojë të dëgjojnë se çfarë do bëjë opozita ndryshe, për të krijuar punë e mundësi për të gjithë dhe sipas saj kjo është beteja e opozitës.
“I lehtë i qoftë dheu 4 djemve të nënave të këtij vendi që nuk u japin më gëzim familjeve të tyre.
4 djem të nënave shqiptare, 4 baballarë a vëllezër humbën sot jetën duke punuar në një kompleks ndërtimi në Gjermani me leje të përkohshme pune, mbas një udhëtimi me peripeci, me punë të pasigurtë, 3 muaj këtu e 3 muaj atje për më shumë mundësi për familjet e tyre nga Mati e Dibra.
Askush nuk largohet me dëshirë nga familja, askush nuk lë fëmijët e prindërit me dëshirë kjo ndodh në kushte ekstreme varfërie, në kushte ekstreme ekonomike kjo ndodh nga pamundësia për të siguruar një jetë më të mirë për familjen këtu.
Ndërkohë që parlamenti duhet të diskutojë buxhetin, kur shikon miliona euro në kontrata koncesionare marramendëse të gjitha kryekëput korruptive, në ndërkohë shqiptarët janë të detyruar të largohen në kërkim të një jete më të mirë. Këtë kanë nevojë sot të dëgjojnë qytetarët se çfarë do bëjmë ne ndryshe, më mirë më shumë se si do e ndalojmë këtë largim masiv, se si do krijojmë punë e mundësi për të gjithë e jo pakicën! Kjo është beteja e opozitës”, shkruan Tabaku.
