Në Stacionin Kufitar të Kakavijes vazhdon fluksi i lëvizjes në të dyja anë e kufirit.
Sipas Policisë Kufitare në Gjirokastër, gjatë 24-orëve të fundit në këtë doganë kanë kaluar 7472 shtetas në hyrje- dalje, nga të cilët 5300 në hyrje dhe 2172 në dalje, si dhe 2340 mjete në hyrje-dalje, nga të cilat 1607 në hyrje dhe 733 në dalje.
Kjo periudhë fundviti, përkon me kthimin e emigrantëve shqiptarë në vendlindje për të kaluar festat e Krishtlindjeve dhe Vitit të Ri. Aktualisht, Policia Kufitare në Kakavije ka marrë masat për evitimin e radhëve të pritjes në sportelet e dokumentave.
Gjithashtu, është rritur prania e efektivëve blu për garantimin e sigurisë publike në mjediset e kësaj dogane dhe për goditjen e ngjarjeve kriminale në vijën kufitare me shtetin grek.
