Përdorimi i teknologjisë VAR në futboll është në një fazë aspak komode. Pavarësisht se ka gjetur shumë mbështetës, të shumtë janë edhe ata që e kritikojnë atë. VAR do të jetë i pranishëm edhe në Kupën e Botës që do të organizohet në Rusi, por sa e ndihmon futbollin teknologjia?
I fundit që ka dalë kundër tij është ish-futbollisti i Bayernit dhe i Kombëtares Franceze, Bixente Lizarazu. Duke iu referuar golit të realizuar nga Falcao në finalen e Kupës ndaj PSG-së, që entuziazmoi tifozët e Monacos, por që u anulua për pozicion jashtë loje pas rishikimit të pamjeve, 48-vjeçari u shpreh:
“Përdorimi i VAR-it është si të bësh seks pa dëshirë. Atëherë ku ti bëhesh gati të shënosh, të ndalojnë. Kështu u ndjeva në stadium në finalen mes PSG dhe Monacos. Fansat e Monacos ishin shumë të entuziazmuar në momentin e golit të shënuar nga Falcao, pastaj u ndal gjithçka. Është e tmerrshme.”
Më tej Lizarazu u shpreh i zhgënjyer për faktin, se gjithmonë favorizohet e njëjta skuadër. “Në rastet e dyshimta vendimet jepen gjithmonë në favor të PSG. Tifozët e kanë humbur rëndësinë, sikur nuk janë pjesë e kësaj loje. Tifozi shkon në stadium për të shijuar spektaklin dhe ne po ia mohojmë. Videot duhet t’i përdorim më mirë, të gjithë duhet ta kuptojnë vendimin. Duhet t’i bëjmë njerëzit pjesë të spektaklit”.
