Milani nuk di të përfitojë edhe ndaj skuadrave të dobëta në letër, vetëm në letër pasi në fushë Frosinone ishte më lart se kuqezinjtë. Kuqezinjtë e Gattusos u ndalën në një barazim pa gola, por edhe për këtë pikë i falen VAR-it dhe portierit Donnarumma. Milani humb akoma edhe më shumë terren në garën për një vend në 4-shen e parë që të kualifikon në Champions League ndërkohë që stoli i Gatussos pas këtij rezultati është lëkundur ndjeshëm dhe gjasat janë që ish-mesfushori të shkarkohet nga stoli i Milanit gjatë orëve në vazhdim.
4 ndeshje pa shënuar është një statistikë negative që Milanit nuk i ndodhte që nga viti i largët 1984, për më tepër 4 ndeshje në të cilat kuqezinjtë duhet të kishin marrë minimalisht 9 ose 10 pikë duke patur parasysh kalendarin. Sfida nisi mirë për skuadrën e Gattusos që goditi shtyllën me Samu Castillejon në pjesën e parë, fraksion loje në të cilin Frosinone gjeti golin me Cianon, por me ndërhyrjen e VAR goli i anulua për një faull të Krajnc ndaj Calhanoglu në fillimet e aksionit.
Në pjesën e dytë kuqezinjtë ishin më kërkues por shpërdoruan shumë përpara portës, me Higuain që kishte një shans të artë në sekondat e fundit të kohës së rregullt, por sulmuesi argjentinas konfirmoi edhe njëherë momentin negativ që po kalon duke gabuar një 11-metërsh në lëvizje. Në shtesë u desh edhe një ndërhyrje shpëtimtare e Donnarummas ndaj Cianos që Milani të mos dilte pa pikë nga kjo transfertë.
