Ushtria gjermane mendohet të jetë përfshirë në një sulm ajror me pasoja të rënda, në Siri, ku humbën jetën shumë civilë. Ishin tornadot gjermanë, ata që kanë vëzhguar objektivin e i kanë dërguar pamjet amerikanëve, shkruan Deutsche Welle.
Sipas hulumtimeve të televizionit, ARD tornadot gjermanë kanë fiksuar pamje të një kompleksi ndërtesash në rajonin e Sirisë, Al-Mansoura, dhe ua kanë dërguar ato koalicionit ndërkombëtar kundër të ashtuquajturit “Shteti Islamik”.
Një ditë më vonë, këto pamje janë përdorur për të bombarduar kompleksin e ndërtesave. Komisioni i Mbrojtjes i Bundestagut duket se është informuar për këtë incident.
Sipas të dhënave të Qendrës Vëzhguese Siriane për të Drejtat e Njeriut, në këtë vend ka qenë një shkollë, e si pasojë e sulmit kanë humbur jetën 33 civilë. Bombardimi është kryer nga avionë luftarakë amerikanë të koalicionit ndërkombëtar, ka bërë të ditur zyra siriane.
Mes viktimave kanë qenë gra dhe fëmijë. Aktivistët e të drejtave të njeriut të qendrës siriane me seli në Londër i bëjnë deklaratat në bazë të pohimeve të informatorëve të tyre, ku thuhet se në këtë ndërtesë ishin strehuar 40 familje.
Edhe agjencia e lajmeve siriane, Sana, ka bërë të ditur se në një sulm ajror amerikan në afërsi të Al-Mansouras, pranë bastionit të ISI-it, Raka, kanë humbur jetën shumë civilë.
