Alergjitë dhe virozat e stinës kanë rritur fluksin e paraqitjes së fëmijëve të vegjël pranë urgjencës së pediatrisë në QSUT. Sipas mjekëve pranë kësaj qendre, mësohet se në urgjencë paraqiten rreth 150 fëmijë gjatë ditëve të javës, ndërsa në fundjavë ky numër shkon deri në 230.
Me rritjen e temperaturave fëmijët paraqesin probleme me lëkurën, e më së shumti ajo që njihet si rrjebulla. “Ajo është një sëmundje që ka bazë alergjike dhe kryesisht në periudhën e pranverës fillon dhe acarohet. Në përgjithësi fëmijët janë të shoqëruar dhe me bronkiolit azmatik që shkaktohet nga polenët e luleve,” thonë mjekët pranë kësaj qendre.
Ndërkohë, mjekja dermatologe, Loreta Kuneshka, ka sqaruar në një intervistë për “Ora News” se, myku i kokës është një tjetër problem te të vegjit, e sidomos në rastet që paraqiten me vonesë te mjeku. “Gjithashtu janë të rritura shumë edhe mykozat, por sidomos myku i kokës, domethënë vijnë shumë pacientë, më shumë dhe nga rrethet, ndoshta edhe ngaqë nuk kanë pasur mundësi për shkak të Covid të paraqiteshin herët te mjkeu dhe vijnë në forma goxha të agravuara të mykut të kokës,” është shprehur Kuneshka.
Problemet mykoze dhe bakteriale janë të tjera shqetësime pediatrike. Këshilla e mjekes është hidratimi i trupit dhe përdorimi i kremrave për mbrojtjen nga dielli. “Prindërit duhet të mos neglizojnë shenjat mykoze, pasi çdo vonesë sjell shumë pasoja”, është shprehur mjekja.
