Sekretari amerikan i Shtetit, Antony Blinken ka lëshuar një deklaratë duke sqaruar se urdhëri ekzekutiv i lëshuar nga presidenti Joe Biden është shenjë e këmbënguljes së SHBA për funksionimin e demokracive.
Blinken u shpreh se SHBA-të janë të përkushtuara për të siguruar stabilitetin dhe sigurinë e Ballkanit Perëndimor, dhe shtoi se korrupsioni dëmton ekonominë e vendit dhe të aleatëve.
Ndër të tjera, Blinken rikonfirmoi edhe një herë, faktin se Presidenti Biden lëshoi sot një Urdhër Ekzekutiv, duke shtuar edhe Shqipërinë në fushën e E.O., një urdhër që autorizon vendosjen e sanksioneve ndaj individëve dhe subjekteve përgjegjëse për korrupsionin në rajon
Deklarata e plotë
Shtetet e Bashkuara janë të përkushtuara për të siguruar stabilitetin dhe sigurinë e Ballkanit Perëndimor, duke lejuar vendet në rajon të përmbushin potencialin e tyre si demokraci të lira dhe të prosperuara. Ne jemi të përkushtuar gjithashtu për të luftuar korrupsionin dhe për të demonstruar përparësitë e qeverisjes transparente dhe të përgjegjshme. Shtetet e Bashkuara e dinë që korrupsioni kërcënon barazinë ekonomike, përpjekjet globale kundër varfërisë dhe zhvillimin dhe vetë demokracinë. Korrupsioni kudo dëmton drejtpërdrejt politikën e jashtme, sigurinë kombëtare dhe shëndetin ekonomik të Shteteve të Bashkuara dhe partnerëve dhe aleatëve tanë. Kjo është arsyeja pse ne jemi të përkushtuar për të promovuar llogaridhënien dhe për të luftuar pandëshkueshmërinë për ata që janë përfshirë në korrupsion në Ballkanin Perëndimor dhe në të gjithë botën.
Në vazhdim të këtij angazhimi, Presidenti Biden lëshoi sot një Urdhër Ekzekutiv, duke shtuar edhe Shqipërinë në fushën e E.O. Urdhëri autorizon vendosjen e sanksioneve ndaj individëve dhe subjekteve përgjegjëse për korrupsionin në rajon, duke përfshirë keqpërdorimin e pasurive publike, shpronësimin e pasurive private për përfitime personale ose qëllime politike, ose ryshfet. E gjithë pasuria dhe interesat në pronën e personave të caktuar në përputhje me këtë urdhër, që janë brenda Shteteve të Bashkuara do të bllokohen. Angazhimi ynë për të promovuar demokracinë, transparencën dhe llogaridhënien, në të gjithë Ballkanin Perëndimor është i palëkundur dhe në përputhje me standardet që vendet e rajonit duhet të përmbushin për të siguruar qëllimet e tyre për të përparuar në rrugën Evropiane.
Deklaratën e DASH, e ka shpërndarë në rrjetin social Twitter, edhe ambasadorja amerikane në vendin tonë, Yuri Kim.
“Korrupsioni kudo dëmton drejtpërdrejt politikën e jashtme, sigurinë kombëtare dhe shëndetin ekonomik të SH.B.A.-së dhe partnerëve dhe aleatëve tanë. Kjo është arsyeja pse ne jemi të përkushtuar të promovojmë llogaridhënie dhe të luftojmë pandëshkueshmërinë për ata që janë përfshirë në korrupsion të rëndësishëm”, shkruan Kim.
“Corruption anywhere directly damages the foreign policy, national security & economic health of the US & our partners & allies. That is why we are committed to promoting accountability & combating impunity for those involved in significant corruption…” https://t.co/VRJqnuT3xN
— Ambassador Yuri Kim (@USAmbAlbania) June 9, 2021
