Lajme jo të mira vijnë nga klubi i Vllaznisë, i cili shumë shpejt mund të falimentojë. Kjo, sepse Ministria e Financave i ka kërkuar Drejtorisë së Përgjithshme të Tatimeve, që të nisë procedurat për shpalljen e falimentit për këtë klub.
Gjithçka ka nisur nga një shkresë e dërguar në Drejtorinë Rajonale të Tatimeve, nga organizata “Intelektualët e Rinj Shpresë”. Kjo e fundit ka kërkuar informacion lidhur me nisjen e procedurave për shpalljen e falimentit për “Vllaznia sh.a”, duke qenë se ky subjekt është me humbje dhe, sipas ligjit, duhet që të nisë shpallja e falimentit, shkruan Panorama.
Organizata në fjalë nuk ka marrë një përgjigje në afatin e caktuar, ndërsa mësohet se një tjetër shkresë është dorëzuar në Ministrinë e Financave.
Klubi shkodran duket se e ka punën “pisk”, meqë kërkohet edhe zyrtarisht nisja e procedurave për shpalljen e falimentit. Në rast se kjo ndodh, kuqeblutë shkojnë direkt në kategorinë më të ulët të futbollit shqiptar.
