Një popull i tërë po vuan dhimbjen e shembjes së urës në Itali, ku për pasojë 39 persona gjetën vdekjen. Ajo mund të quhet dhe si ura më e “mallkuar”, e quajtur “Morandi”, për nder të inxhinierit Ricardo Morandi, njeriut që e projektoi këtë vepër infrastrukturore, e që sot ndaj tij janë drejtuar reflektorët e urrejtjes.
U deshën 4 vite për ndërtimin e urës së lartë të Xhenovës, e cila u financua nga Enti Italian i Ujësjellësit. Punimet zgjatën nga viti 1963-1967, për atë që në atë kohë u quajt një vepër e rëndësishme, por që sot është kthyer në makthin e gadishullit Apenin.
Versionet e rënies janë disa, duke nisur që prej amortizimit, defektit në konstrukt, e deri mbingarkesa prej trafikut apo motit me furtunë.
Megjithatë, ura “Morandi” ka pasur një histori të gjatë tersi, duke u shoqëruar periodikisht me probleme. Betoni i ngrirë në urë skadoi vetëm për pak vite dhe ajo iu nënshtrua një rikonstruksioni të herëpashershëm.
Ura lidhte qytetin e madh port të Xhenovës me Savonën e Ventimiglia-n, por edhe pjesë të rivierës ligure. Ajo ishte një segment i autostradës A10 të super populluar dhe që ishin parashtruar kërkesa për ta bllokuar.
E fundit ishte 4 vjet më parë, por pjesëtarët e partisë sot në qeverisje, 5 Yjet, e kundërshtuan, duke e cilësuar si një vepër historike. Ishte e gjatë mbi 1 kilometër, ekzaktësisht 1183 metra ndërsa e lartë 90 metra. Një lartësi që ka ndihmuar mjaft edhe në lëkundjen e strukturave. Rrëzimi ndodhi gjatë një stuhie të tmerrshme, ku pati edhe gjëmime dhe rrufe të fuqishme.
Në rrjet kanë nisur siç ndodh shpesh në historitë e tilla shkaku të kërkohet dhe në qiell pasi edhe atmosfera e rrëzimit ishte apokaliptike. Prokuroria ka nisur menjëherë hetimet, ndërkohë që partitë fajësojnë njëra-tjetrën.
