Jorida Tabaku është shprehur e bindur se betejën më 11 maj do ta fitojë, edhe pse tashmë është në një situatë ndryshe pasi edhe pse sipas saj punon gjithmonë për PD, sot kërkon votë personale pasi është në listat e hapura të demokratëve.
Në një emision televiziv, Tabaku u shpreh se do të jetë pjesë e deputetëve të PD në legjislaturën e ardhshme, kjo sepse këtë punë e sheh si misionin jo si punë.
Ajo zbuloi edhe detaje nga fushata e saj, ku tha se po përpiqet që të përcjellë një mesazh që ka të njëjtat shqetësime si qytetarët dhe se bën gabime në rrugëtimin e saj, por që gjithmonë përpiqet të bëjë maksimumin.
“Kam dashur të jem një zë ndryshe dhe të krijoja rrugën time.
Mendoj që politika është kthyer sot në një punë burrash dhe përfaqësi burrash sepse duket sikur është punë të fortësh por nuk duhet të jetë kështu. Gratë duhet të japin një model, për shembull këto kohë në fushatë nuk e kam treguar pjesën e familjes sepse im shoq është pak skeptik dhe nuk dëshiron që të dalin, por dua të tregoj që në fund të ditës jam nënë e 3 fëmijëve për të cilat kamë të njëjtat shqetësime si qytetarët, që e bëj pazarin vetë. Po tregon një model që nuk i bëj të gjitha mirë por që përpiqem të bëj maksimumin.
Kam punuar dhe do të vijoj të punoj gjithmonë për PD por sot jam në një pozitë ndryshe, kërkoj votë personale, jam në një sfidë që do ta fitoj, jam e bindur për këtë nuk kam asnjë dyshim. Unë do të jem sërish në Parlament sepse e shoh mbështetjen që kanë njerëzit por nga ana tjetër është diçka që nuk e konsideroj pune, por mision që e bëj me shumë pasion. Kjo nuk është punë me 8 orë që t’i shkon në shtëpi dhe e mbyll, ti e jeton gjithë ditën. Jam natyrë që nuk dorëzohem dhe u shkoj gjërave deri në fund dhe jam e bindur se do ta kem mbështetjen e qytetarëve”, ka përfunduar ajo.
