Kryetari i grupit parlamentar të Partisë Demokratike, Gazment Bardhi, ka kritikuar ashpër kryeministrin Edi Rama dhe ministren Belinda Balluku për trajtimin e çështjes së energjisë elektrike, duke e cilësuar uljen e fundit të çmimit si një “mashtrim elektoral”.
Bardhi theksoi se qytetarët shqiptarë paguajnë çmimin më të lartë të energjisë në rajon, një situatë që ai e lidh me abuzimet në sektorin e energjisë. “Edi Rama dhe Belinda Balluku e kanë rritur çmimin e energjisë me 30% gjatë viteve të fundit. Tani e quajnë historike një ulje minimale prej 1 lek për kilovat, ndërsa qytetarët tanë paguajnë më shumë se Kosova, Mali i Zi dhe Bosnja,” deklaroi ai.
Deputeti akuzoi Ramën për përdorimin e uljes së çmimit si një manovër për të mashtruar elektoratin përpara zgjedhjeve. “Sa herë afrojnë zgjedhjet, Edi Rama pretendon të ulë çmimet që vetë i ka rritur, vetëm për të përfituar politikisht. Kjo ulje është e përkohshme dhe zgjat vetëm për 10 muaj,” u shpreh Bardhi.
Ai propozoi që çmimi i energjisë të ulet përfundimisht, duke vendosur tarifa më të ulëta për familjet në nevojë dhe ato me të ardhura mesatare. “Qeveria duhet të garantojë ulje të qëndrueshme të çmimit të energjisë dhe të mbrojë familjet shqiptare nga barrat e tepërta financiare. Shqiptarët nuk mund të vazhdojnë të paguajnë për abuzimet dhe korrupsionin e një grushti të vogël njerëzish të pasuruar në kurriz të tyre,” përfundoi Bardhi.
