Ukraina ka njoftuar se është vrarë një kolonel i shërbimit të sigurisë dhe tre persona të tjerë janë lënduar pasi ka shpërthyer makina me të cilën këta persona ishin duke udhëtuar.
Shërbimi i Sigurisë ka thënë se Yuriy Vozny është vrarë derisa ishte duke udhëtuar me tre persona të tjerë kur ka shpërthyer vetura në distriktin, Kostyantynivka, vend i kontrolluar nga Ukraina, në rajonin e Donetskut.
Vdekja e Voznyt vjen pas vrasjes së kolonelit ukrainas, Maksim Shapoval, gjatë një incidenti me makinë bombë në Kiev.
Tre personat e lënduar nga incidenti i sotëm janë dërguar në spital, shkruan REL.
Shërbimi i Sigurisë në Ukrainë ka thënë se Vozny është zyrtari i 23-të në shërbimin e sigurisë që është vrarë prej kur ka filluar konflikti në lindje të Ukrainës më 2014.
Rusia e mohon që është pjesë e konfliktit në atë pjesë dhe se nuk mbështetë asnjë forcë ushtarake.
Më shumë se 10,000 persona janë vrarë nga fillimi i konfliktit në Ukrainë nga viti 2014.
