Sekretari amerikan i mbrojtjes, Jim Mattis, dhe diplomatë të tjerë botërorë kanë zbritur në kryeqytetin Kiev, për të festuar Ditën e Pavarësisë së Ukrainës. Mattis do të takohet me presidentin e Ukrainës, Petro Poroshenko, dhe me ministrin e mbrojtjes, Stepan Poltorak.
Në përvjetorin e 26-të të pavarësisë së Ukrainës nga ish-Bashkimi Sovjetik, separatistët e mbështetur nga Rusia në pjesën lindore të këtij vendi kanë shprehur përkushtim për respektim të marrëveshjes për armëpushim, para fillimit të vitit të ri shkollor.
Disa pajtueshmëri për armëpushim të shpallura në kuadër të Marrëveshjes së Minskut në vitin 2015, kanë dështuar. Ndërkohë që prej prillit të vitit 2014, kur ka filluar ky konflikt, Kombet e Bashkuara vlerësojnë se janë vrarë 10,090 njerëz, përfshirë 2,777 civilë, dhe së paku 23,966 vetë janë plagosur.
