Kryeministri Edi Rama gjatë konferencës për mediet është pyetur lidhur me diskutimet e bëra me homologen italiane, Giorgia Meloni, lidhur me tubacionin i cili do të niset nga Shqipëria dhe do të çojë ujë në një rajon jugor të Italisë.
Rama tha se deri më tani nuk ka asnjë projekt dhe se tubacioni nënujor për transportimin e ujit nga Gjirokastra në Pulia, është thjesht një ide e diskutuar nga shumë qeveri italiane.
Kryeministri theksoi se nuk është bërë asgjë konkrete dhe e gjitha varet nga vullneti i Italisë, pasi është një porjekt i madh të cilin vendi ynë s’mund ta realizojë dot.
“Ska një projekt këto janë të gjitha ide. Ideja e ujit është një ide që daton para luftës së dytë botërore që ta dini ju dhe është një ide që e kanë promovuar të gjitha qeveritë italiane por nuk është bërë asgjë konkrete. Kjo varet nga vullneti i qeverisë italiane sepse është një projekt i madh që Shqipëria nuk mund ta realizojë dot.
Janë gjëra që janë diskutuar në të shkuarën nuk ka gjëra të reja. Më shumë gjasë do të kemi shumë shpejt në Romë një takim të dytë të komintetit të investimeve. Takimin e parë e zhvilloi Ministria e Jashtme në Romë, e do shohim si do shkojë. Pastaj kemi Samitin këtu ku do të jetë kryeministrja prezente. Do të kemi kohë ti shohim të gjitha si do artikulohen”, tha Rama.
