Javën e ardhshme rikthehet në funksion të plotë Urgjenca e Qendrës Spitalore Universitare “Nënë Tereza”.
Pas afro 4 muajsh nga zjarri i rënë në këtë godinë, drejtues të QSUT njoftojnë përfundimin e punimeve.
Në daljen e parë për mediat drejtoresha Alma Cani tha se po bëhen testimet e fundit të aparaturave për t`u vënë në shërbim të rasteve urgjente. 28 milionë leke i kushtoi buxhetit të shtetit riparimi i dëmeve në urgjencën e re të QSUT e cila u përfshi nga flakët në shkurt të këtij viti. Dëmet më të mëdha ishin në rrjetin elektrik dhe atë të aspirimit.
Urgjenca e Polivalente ishte investimi më i ri në QSUT me vlerë 17 milionë euro. Kur ende nuk ishte bërë një vit nga inaugurimi i saj, ky shërbim u përfshi nga flakët duke e nxjerrë jashtë funksioni.
Në këtë situatë, Ministria e Shëndetësisë vuri në funksion të rasteve urgjente dy spitalet e tjerë universitare, Sanatoriumin dhe Traumën.
Për ngjarjen e ndodhur në QSUT, ministrja e Shëndetësisë largoi nga detyra drejtoreshën Albana Fico. Vendosja e drejtorit të ri Alma Cani, me motivin për të zgjidhur problemin në Urgjencë, u pasua më kryerjen e një tenderi me vlerë 28 milionë lekë për riparimin e dëmeve.
E njëjta kompani që ndërtoi Urgjencën, mori me procedurën e negocimit edhe tenderin për riparimin e saj pas zjarrit.
