Detaje të reja janë mësuar nga ngjarja e bërë publike një ditë më parë ku një 2-vjeçare u dërgua në QSUT me shenja diegie në trup.
Dy vjeçarja e cila u dërgua në spital me shenja diegie në trup, do të merret në përkujdesje nga shërbimi social. Agjentët e Komisariatit nr. 4 po përgatisin dokumentacionin për përcjellën e rastit te shërbimi social për heqjen e të drejtës së prindërimit, shkruan Dosja.al.
2-vjeçarja e cila u dërgua në QSUT më 15 nëntor nga e halla e saj, sipas burimeve pranë policisë, rezulton që shenjat e diegieve me cigare t’i jenë bërë të paktën 1 javë para se të dërgohej për mjekim. Nga hetimet që policia ka kryer deri tani rezulton se shenjat janë shkaktuar nga vëllai i saj 9 vjeç. Djali është marrë në pyetje në praninë e psikologut dhe ka pranuar se ai është shkaktari i shenjave, pa një sqarim të qartë se pse. Në pyetje janë marrë edhe halla dhe prindërit e vajzës.
Fillimisht policia ka pasur dyshime për autorin e diegieve, por pas veprimeve hetimore ka rezultuar se vajza e vogël nuk është dhunuar nga persona të tjerë. Mbi dyshime, janë kryer 2 ekspertiza mjeko-ligjore, e para për të përcaktuar nga çfarë janë shkaktuar shenjat, që ka rezultuar nga cigarja dhe e dyta mundësia e një abuzimi seksual të mundshëm.
Nga ekzaminimet e mjekësisë ligjore ka rezultuar se vajza nuk është dhunuar seksualisht. 2-vjeçarja gjendet në shërbimin e reanimacionit të pediatrisë në QSUT dhe gjendja është stabël dhe në monitorim.
