U vunë nën akuzë pasi në bashkëpunim me një shqiptare i vunë zjarrin banesës së saj, për të përfituar paratë e sigurimeve, por ia hodhën aq mirë, sa tani do të marrin edhe dëmshpërblim për kohën që ndenjën në paraburgim.
Prokuroria kërkonte 25 vjet dhe 6 muaj burg për të katër shqiptarët e akuzuar shkruan oltnertagblatt.ch. Por, ata të katër kanë qëlluar me shumë fat, pasi mundën t’i shpëtojnë dënimit.
Akuza ndaj tyre ka qenë e mbështetur mbi dëshminë e një dëshmitari anonim dhe, në një rast të tillë nuk mund të ngrihet një akuzë, ndërkohë që edhe arrestimi i të përmendurve mbi këtë bazë është i kundërligjshëm.
Kështu, gjyqtari ka vepruar sipas parimit “in dubio pro res” (në rast dyshimi, në favor të të akuzuarit), dhe të akuzuarit janë shpallur të lirë në pikën kryesore të akuzës. Për më tepër, ata do të marrin dëmshpërblim prej 40 mijë frangash për qëndrimin në paraburgim.
Vetëm kosovarja me emrin e koduar Rilinda O., është dënuar për tentim të mashtrimit të sigurimit me gjobë me kusht prej 192 njësish ditore nga 10 franga si dhe një vërejtje.
Dënime kanë marrë edhe të akuzuarit tjerë por, për vepra penale që nuk kanë të bëjnë me zjarrvënien.
Në procesin që ka përfunduar dje, synohej të zbulohej se kush ka qenë porositësi i zjarrvënies dhe kush e ka vënë zjarrin. Veç kësaj dy nga burrat dhe gruaja dyshoheshin edhe për vepra të tjera si mashtrim, tentim mashtrimi, shkelje të rregullave në komunikacion dhe shkelje të ligjit mbi të huajt.
Rrjedha e ngjarjes sipas prokurorisë është dukur kështu: Rilinda banonte në banesën të cilës “duhej” t`i vihej zjarri. Partneri i saj i atëhershëm, Indrit G.* bashkë me të njohurin tjetër Murat A.* po kërkonin dikë që do të ishte i gatshëm të ndizte banesën e gruas. Ata së bashku e kanë pyetur Besim H.* nëse ai njihte dikë që mund ta bënte këtë veprim. Pastaj Indriti ia jep Besimit një çelës të banesës, me të cilin Besimi hyn më 4 mars në banesë dhe i vë zjarrin asaj. Për këtë “punë” ai do të ketë marrë 6000 franga nga Indriti.
Rilinda pastaj i ka deklaruar sigurimit se në banesën e djegur ka pasur stoli ari që vlenin 11 mijë franga bashkë me 6000 franga në bankënota, përcjell albinfo.ch. Por ndërkohë ishte konstatuar se kjo nuk qëndronte kështu që sigurimi nuk ka paguar asgjë.
Ajo që ka bërë përshtypje gjatë gjykimit është se 3 nga 4 të akuzuarit përveç që nuk kanë pranuar veprën, nuk kanë pranuar të përgjigjen për asgjë që janë pyetur. Vetëm Besim H. është treguar më i vullnetshëm për të folur, por edhe ai e ka hedhur poshtë akuzën. Sipas tij, ai, propozimin e Indritit dhe Muratit për zjarrvënie e kishte refuzuar.
Prokurori kishte kërkuar për Indritin 7, për Muratin 4.5, për Rilindën, 6 dhe për Besimin, 8 vjet heqje lirie, gjithsej 25 vjet e 6 muaj. Nga ana tjetër, mbrojtësit e tyre kanë kërkuar lirim si të pafajshëm, për mungesë provash.
Tashmë të gjithë janë të lirë, por nga ana tjetër edhe do të dëmshpërblehen për periudhën që kanë qëndruar në burg.
