Tymi nga zjarret pyjore që po shkrumbojnë tre provinca të Kanadasë ka mbuluar rreth një të tretën e territorit të Shteteve të Bashkuara të Amerikës, njoftuan meteorologët amerikanë.
Megjithatë, ndikimi në cilësinë e ajrit është i kufizuar, përveç në rajonin e Nju Inglendit, si dhe në disa pjesë të shtetit të Nju Jorkut dhe shteteve të Mesdheut amerikan.
Mjegulla, e cila dje shkaktoi nivele të rrezikshme ndotjeje të ajrit në shtetin e Minesotës, shtrihet nga Dakotat, përgjatë luginës së Ohajos, deri në verilindje të SHBA-ve dhe në jug deri në Xhorxhia, sipas Qendrës së Parashikimeve të Shërbimit Kombëtar Meteorologjik në College Park, Maryland.
“Shumica e tymit ndodhet në shtresat e sipërme të atmosferës, kështu që në shumë zona nuk ka pasur ndikim serioz në cilësinë e ajrit“, shpjegoi Mark Chenard, meteorolog i Shërbimit Kombëtar Meteorologjik të SHBA-së. “Por në Nju Jork dhe Connecticut kemi probleme, pasi tymi është më i trashë dhe më afër tokës.”
Zjarret masive në Kanada kanë nisur që në fillim të majit. Më shumë se 212 vatra aktive zjarresh janë regjistruar vetëm dje pasdite, gjysma e të cilave janë të pakontrolluara, sipas Qendrës Kanadeze të Zjarreve Pyjore. Deri tani janë djegur mbi 2 milionë hektarë tokë pyjore.
Yang Liu, profesor i shëndetit mjedisor në Universitetin Emory në Atlanta, paralajmëroi se foshnjat, të moshuarit dhe personat me probleme shëndetësore janë më të rrezikuarit nga tymi, por theksoi se ndikimi është i gjithanshëm. “Tymi ndikon në të gjithë, në çdo aspekt të jetës së përditshme”, tha ai. “Situata është e rëndë.”
Një nga pikat me cilësinë më të keqe të ajrit sot në mëngjes në verilindje të SHBA-ve ishte Williamstown, në Massachusetts, pranë kufirit me Vermontin dhe shtetin e Nju Jorkut.
Atje u regjistrua një nivel ndotjeje “shumë i pashëndetshëm”, me një vlerë 228, sipas IQAir, një faqe që monitoron cilësinë e ajrit në mbarë botën.
Një nivel më pak se 50 konsiderohet “i mirë”, ndërsa vlerat midis 100 dhe 300 vlerësohen “të pashëndetshme” deri “shumë të pashëndetshme”. Vlerat mbi këtë kufi konsiderohen “të rrezikshme”, sipas të njëjtës faqe.
