Mbrojtësi turk i skuadrës së Besiktas, Caner Erkin, rrezikon të dënohet me 2 vite burg si shkak i fyerjes që futbollisti i ka bërë gjyqtarit në takimin kundër Basaksehir më 23 tetor. Arbitri Mete Kalkavan e ndëshkoi 29-vjeçarin me karton të verdhë dhe ky i fundit i acaruar nuk e ka kursyer gjuhën ndaj tij. Sipas “Anadolu” gjyqtari nuk i ka kapërdirë fjalët e ish-futbollistit të Inter të cilin e ka paditur në gjyq.
Akuza me të cilën Erkin përballet është ajo e fyerjes ndaj një “funksionari me përgjegjësi për të ruajtur rendin publik” dhe masa ndëshkimore është 2 vite burg si dhe një gjobë e majme.
Por çfarë ndodh në Shqipëri nëse fyet një arbitër?
Të shumta janë rastet ku futbollistët në fushën e lojës janë të acaruar qoftë nga rrjedha e ndeshjes, apo nga faullet e shumta që akordon arbitri i takimit. Në momentin që arbitri akordon një faull, ata i vërsulen me një lumë fjalësh ofenduese, por dënimi që marrin nuk bëhet shembull për futbollistët e tjerë të kampionatit shqiptar.
Kujtojmë rastin e Trashit të Partizanit që nuk u përmbajt ndaj arbitrit anësorë dhe u dënua me dy ndeshje dhe si rregull duhet të mungonte edhe në ndeshjen që do të zhvillohej në Korçë përballë Skënderbeut. Por aty ndërhynë klubi dhe dënimin e mbetur e konverton në para dhe ai është në dispozicion të trajnerit. Edhe ky i fundit vuante një dënim për të njëjtë arsye dhe dënimi ishte më i madh me 8 ndeshje, por edhe në këtë rast gjithçka e zgjidhi paraja. Ka edhe raste të tjera pa fund të ofendimeve, shtyrjeve apo edhe të ekstremit, që shkon deri në dhunimin e arbitrave.
Nëse do të kishte ligje dhe rregulla më të forta në kampionatin shqiptar nuk do të shikonim skena të turpshme, të cilat hedhin poshtë vlerat që duhet të shpërndajë futbolli. Por nuk kemi parë dhe ndonjë rast ku arbitri të hedhë në gjyq, si çka ndodhur në Turqi, për të kërkuar dënimin apo të drejtën morale pasi është thjeshtë duke kryer detyrën.
Këtu futet në lojë pastërtia e futbollit në Shqipëri. Nëse kanë të drejtë apo jo arbitrat në vendimin që marrin, apo sa profesionistë janë. Lind dyshim i madh në këtë pikë, pasi dëgjojmë çdo javë akuza të rënda ndaj arbitrave për njëanshmëri në fushën e lojës. Nëse instancat përkatëse do të funksionojnë si duhet, atëherë të gjitha problematikat do të zgjidheshin në mënyrën e duhur, sportdashësit, futbollistët dhe çdo funksionarë i ekipit nuk do të shikonin “motrën” e arbitrit në fushë më shumë se topin. TIRANA TODAY
