Turqia do të presë Shqipërinë në miqësoren që do të zhvillohet ditën e sotme në Antalya. Kjo do të jetë miqësorja e parë që zhvillohet me në krye teknikun Panucci. Nëse do ta vlerësonim këtë përballje nga historiku i takimeve të mëparshme mund ti cilësojmë si dy ekipe të barabarta, pasi në 9 ndeshje 4 herë kanë fituar turqit, tre herë kuqezinjtë dhe dy sfida janë mbyllur në barazim.
Por në ndeshjen që do të zhvillohet sot kuqezinjtë janë të vetëdijshëm që turqit kanë një nivel më të lartë. Panucci duke e vlerësuar si një nga miqësoret më të rëndësishme për të testuar lojtarët e tij, ka vendosur që të sjellë në ekip tre lojtarë të rinj Ramadanin, Qakën dhe Hajdareviç. Këta lojtarë pritet të hidhen në fushën e lojës sonte mbase që në minutat e para. Shqipëria e sheh veten favorite në këtë sfidë pasi në dy ndeshjet miqësore që janë zhvilluar kanë arritur ta mposhtin kundërshtarin dhe me rezultate të thella. Golavarazhi i kësaj sfide është 8/11 në favor të kuqezinjve.
13 Dhjetor 1970 Turqi – Shqipëri 2-1 (Euro)
14 Nëntor 1971 Shqipëri – Turqi 3-0 (Euro)
27 Tetor 1982 Turqi – Shqipëri 1-0 (Euro)
11 Maj 1983 Shqipëri – Turqi 1-1 (Euro)
27 Mars 1985 Shqipëri – Turqi 0-0 (Miqësore)
21 Janar 1998 Turqi – Shqipëri 1-4 (Miqësore)
25 Prill 2001 Turqi – Shqipëri 0-2 (Miqësore)
26 Mars 2005 Turqi – Shqipëri 2-0 (Botëror)
12 Tetor 2005 Shqipëri – Turqi 0-1 (Botëror)
Panucci pritet të sjellë disa risi në formacionin që do të hedhë në fushë sonte dhe pritet të jetë ofansiv, pasi edhe mentaliteti i tij është të zhvillojë një lojë të bukur dhe sa më intensive. Berisha është i konfirmuar në portë, në mungesë të Strakoshës që ka udhëtuar drejt Italisë. Hysaj, Ajeti dhe Mavraj do të plotësohet në rreshtimin me katër me Lenjanin, që pritet ta nisë takimin nga minuta e parë. Lenjani është preferuar përpara Alijit dhe Balliut në të majtë. Në mesfushë pas problemeve fizike të Bashës vendin e titullarit nga minuta e parë do ta ketë Sabien Lilaj. Konfirmohen Memushaj e Xhaka për ta plotësuar treshen e mesfushës. I sapoardhuri Astrit Ajdareviç pritet ta nisë nga stoli, ndërsa pritet të ketë disa minuta dhe për Qakën. Me Roshin në të djathtë, Grezdën në të majtë dhe Sadikun në qendër Panucci ka në mendje një sulm agresiv qe nga minuta e parë.
