Presidenti i SHBA-së, Donald Trump ka deklaruar se NATO tashmë po lufton terrorizmin, ndryshe nga ç’mendonte më parë se Aleanca e Atlantikut të Veriut kishte dalë nga përdorimi.
Trump deklaroi se ka ende shumë punë, ndaj u bëri thirrje vendeve anëtare që të kontribuojnë më shumë për Aleancën.
“Nëse vendet e tjera paguajnë pjesën e tyre në vend, që të mbështeten tek SHBA, atëherë të gjithë mund të jemi më të sigurtë”, tha shefi i Shtëpisë së Bardhë.
Por deklarata për NATO-n nuk ishte e vetmja kthesë drastike e Trump këtë të mërkurë. Ai tha, në një intervistë për “Wall Street Journal”, se nuk do ta etiketonte Kinën si një manipuluese të valutës, pavarësisht se ishte zotuar që do ta bënte një gjë të tillë, sapo të merrte detyrën.
