Fëmijët e lindur në Shtetet e Bashkuara të Amerikës mund të mos përfitojnë më shtetësinë amerikane. Është ky vendimi më i fundit i presidentit Trump, i cili po planifikon të firmosë një urdhër ekzekutiv që do t’i jepte fund të drejtës së fëmijëve të lindur në Amerikë për të marrë shtetësi amerikane, në qoftë se prindërit e tyre janë emigrantë apo qytetarë pa shtetësi amerikane.
Nuk është ende e qartë nëse presidenti amerikan ka autoritetin dhe të drejtën për të hequr shtetësinë atyre që lindin në SHBA vetëm me një urdhër ekzekutiv, raporton CNN.
Në një intervistë për “Axios on HBO”, Trump tha: “Ne jemi i vetmi vend në botë, ku një çift vjen, lind një fëmijë këtu dhe foshnja është një shtetas i SHBA-ve për 85 vite me radhë, me të gjitha përfitimet. Kjo është vërtet qesharake dhe duhet të marrë fund. Më thonin gjithnjë se kemi nevojë për një ndryshim kushtetues për ta bërë këtë. E dini çfarë? Nuk kemi nevojë, pasi kjo mund të bëhet me një akt Kongresi. Tashmë, këshilluesit më kanë thënë se mund ta bëj këtë vetëm me anë të një urdhri ekzekutiv”.
Presidenti nuk dha detaje për planin e tij, por tha se “kjo është në proces e sipër dhe që do të ndodhë”./ TIRANA TODAY
