Presidenti i SHBA-ve, Donald Trump, ka përshëndetur vendimin e Gjykatës së Lartë të SHBA-ve të shpallur të premten, që ndalon gjykatat më të ulëta të bllokojnë lehtësisht vendimet e presidentit të vendit. Trump e ka cilësuar këtë si një “fitore historike për Kushtetutën, ndarjen e pushteteve dhe shtetin e së drejtës”.
Në deklaratat e tij për mediat, Trump u shpreh se vendimi i lartëson kompetencat e ekzekutivit dhe “rrëzon përdorimin e tepruar të masave ndaluese mbarëkombëtare, që kanë ndërhyrë në mënyrë të pajustifikuar në funksionimin normal të pushtetit ekzekutiv”. “A nuk ishte e jashtëzakonshme? Ishte një vendim i madh, i shkëlqyer. Na bën shumë të lumtur,” deklaroi Trump me entuziazëm përpara gazetarëve.
Presidenti nuk kurseu sulmet ndaj gjyqtarëve që i konsideron si “radikalë të majtë”, duke i akuzuar për keqpërdorim të pushtetit përmes masave ndaluese. Ai e cilësoi këtë praktikë si një “kërcënim serioz për demokracinë dhe një abuzim kolosal të pushtetit gjyqësor”. Në lidhje me politikën e dhënies së shtetësisë për fëmijët e lindur nga të huaj në SHBA, Trump deklaroi se do të paraqesë menjëherë një kërkesë për të rifilluar përpjekjet për ta ndalur këtë praktikë.
