Presidenti i SHBA-ve, Donald Trump dhe Presidenti i Turqisë, Rexhep Taip Erdogan, në një konferencë të përbashkët për media, pas takimit të zhvilluar në Shtëpinë e Bardhë, shprehën nevojën për luftën e përbashkët kundër organizatave terroriste, në veçanti kundër DEASH-it, raporton Anadolu Agency (AA)
Presidenti i SHBA-ve, Donald Trump tha para mediave se mes SHBA-ve dhe Turqisë ekzistojnë marrëdhënie të thella që datojnë nga e kaluara e largët, si dhe ka shtuar se nuk e harrojnë faktin që ushtarët turq kanë luftuar së bashku me ato amerikanë gjatë Luftës së Koresë dhe se Turqia ka qëndruar kundër ekspansionizmit komunist dhe sovjetik.
“Është legjendar guximi i turqve në luftë”, tha Trump, duke theksuar më tej se edhe sot ekziston rrezik i ri nga terrorizmi, ndaj të cilit do të vazhdojnë të luftojnë së bashku.
“Populli turk në vitet dhe kohët e fundit është përballur me sulme të tmerrshme terroriste. Ne shprehim ngushëllimet tona për viktimat e këtyre sulmeve dhe i ofrojmë mbështetjen tonë popullit turk. Japim mbështetje për Turqinë në luftën kundër grupeve terroriste si PKK dhe DEASH dhe i ofrojmë siguri që të mos u lihet hapësirë e sigurtë grupeve terroriste”, ka deklaruar më tej Trump.
Ndërsa Presidenti Erdogan është shprehur se, Turqia me SHBA-në janë në bashkëpunim të afërt brenda institucioneve kyçe si OKB, NATO dhe G20.
Në kuadër të luftës ndërkombëtare kundër terrorizmit, Erdogan nënvizoi në fjalën e tij se, “Në të ardhmen e rajonit tonë nuk ka vend për organizatat terroriste”.
Pasi ka theksuar se në takim kanë vlerësuar hapat e përbashkët që mund të hidhen në Siri dhe Irak, presidenti Erdoğan, tha se: “Fitorja e zgjedhjeve nga Trump ka sjellë lindjen e pritshmërive të reja, çeljen e filizave të shpresës në rajonin ku ndodhet Turqia. Ne besojmë se qeveria e re e SHBA-ve nuk do të nxjerrë boshe këto shpresa. E gjejmë goxha me vend qëndrimin pas sulmit të fundit kimik nga regjimi i Asadit në Siri. Shpresojmë se do të vijë vazhdimësia e hapave që do të rikuperojnë gabimet e përjetuara në të kaluarën në çështjen e luftës parimore dhe të vendosur kundër organizatave terroriste”.
