Aktori Alfred Trebicka është shprehur i vendosur, sikundër një pjesë e madhe e aktorëve, të cilët kërkojnë që të mos prishet Teatri. I ftuar në emisionin “Ditë e Re”, aktori pohoi se do të rezistojnë, duke qënë të vendosur që godina të ruajë identitetin e saj.
"Ne do të rezistojmë. Jemi të vendosur që godina të ruajë identitetin e saj, të ruajë kujtesën e saj. Rrijnë dhe i gjejnë nga një etiketim si dopo lavoro, e vjetër. Nuk është problemi tek arkitektura, por tek territori. Është zbuluar se ku është pishina, poshtë ka 'florinj' të fshehur, sepse floriri është tek kulla, dhe pastaj kur ngrihen kullat dalin florinjtë".
Një ditë më parë, kryetari i Bashkisë së Tiranës, Erion Veliaj, zhvilloi një tryezë të gjerë konsultimi me artistë mbi çështjen e Teatrit Kombëtar. Në prezencën e ministres së Kulturës, Mirela Kumbaro, ai renditi të paktën tre argumente, që sipas tij, çojnë në konkluzionin që Teatri duhet të rindërtohet. Trebicka nënvizoi se do ishte turp i madh për aktorët, nëse Teatri do të shembej.
"Pjesa më e madhe e komunitetit teatror është për ta mbrojtur atë Teatër, për ta ruajtur, sepse do ta arrijmë, nuk mund ta përcaktoj unë. Shpresoj që të mos shembet. Pavarësisht se është krijuar opinioni apo është vizatuar klima se kjo punë do kalojë. Unë prap kam shpresë që nuk do të shkohet deri në atë hap, sepse do të ishte turp shumë i madh, jo vetëm për ata që do ta bëjnë, ndërmarrin këtë hap me ligjor, por të paligjshëm. Këta thonë se është me ligj, me amendament, me VKM, por ligjet i bëjnë njerëzit. Fshihen mbrapa ligjeve. Ligjet kanë vlerën e vetë, po mënyra sesi i bëjnë ligjet po i shikojmë. Do të ishte turp për ata por edhe për ne, që e ndjerë prej vitesh këtë sepse është një histori e vjetër, që në vitet '98. Qoftë edhe se kemi ndenjur në heshtje gjatë gjithë këtyre viteve, por gjithmonë kemi ndenjur në heshtje me sensin që nuk do të shkojë mendja njeriu se do ta bëjnë këtë gjë. Se kisha menduar kurrë se ai paska fjetur 20 vite vetëm me këtë mendje, dhe të vinte kjo ditë".
Aktori tha se është punuar shumë kohë për degradimin e Teatrit Kombëtar: "Dhe është punuar për këtë. Është punuar me kohë për degradimin e godinës, institucionit, të vlerave të këtyre 5 viteve, se nuk mund të degradojnë vlerat që ka Teatri që nga themelimi i tij. Atë nuk e bëjnë dot dhe bëjnë këtë tjetrën, degradojnë këtë që është tani në të gjitha kuptimet, aq sa dhe ne që jemi në krahun më të fortë për ta mbrojtur, në momente të caktuara themi me vete: Mos kanë të drejtë sepse kjo ka mbaruar. Në këtë sens kjo nuk na falet neve. Që në këtë periudhë e kemi nenvlerësuar, sepse kurrë se kemi menduar se do ndodhte".
