Holanda përkujton sot viktimat e aksidentit ajror, i cili ndodhi 3 vjet më parë duke lënë 298 të vdekur.
Sot do të mblidhen mbi 2,000 veta për të zbuluar një memorial për viktimat e fluturimit MH17.
Monumenti përbëhet nga 298 drunj të mbjellur dhe një pllakë përkujtimore, ndërsa motivi i tij do të jetë “ për të jetuar”.
Aeroplani i kompanisë Malaysia Airlines u qëllua me një raketë nga pjesa lindore e Ukrainës më 17 korrik të vitit 2014, si pasojë e të cilit vdiqën të 298 njerëzit që ndodheshin në bord.
Aeroplani ka qenë duke udhëtuar nga aeroporti Schiphol i Amsterdamit për në Kuala Lampur, ndërsa shumica e viktimave kanë qenë holandezë.
Familjarët do të lexojnë sot emrat e të 298 pasagjerëve dhe anëtarëve të ekuipazhit të vrarë në fatkeqësi.
Hetuesit holandezë kanë konstatuar në vitin 2015 se aeroplani është rrëzuar nga një raketë Buk, e bërë në Rusi, ndërsa vetë Rusia i ka hedhur poshtë këto hetime.
