Policia e Tiranës ka referuar materialet në prokurori për tre të rinjtë, të cilët janë futur në stadium me sende të palejuara, ndërsa njëri prej tyre ka hedhur sende të forta në fushë.
Në njoftimin e saj, policia shprehet se gjatë ndeshjes Partizani-Elbasani, një prej këtyre të rinjve, konkretisht 25-vjeçari B. H., ka hedhur sende të forta në fushë.
Ndërsa 35-vjeçarit A. K. iu gjetën lëndë piroteknike dhe 36-vjeçarit E. P. iu gjet një mjet prerës.
Të tre personat do të procedohen nga prokuroria në gjendje të lirë.
“Specialistët për Hetimin e Krimeve të Komisariatit të Policisë Nr. 4 referuan materialet në Prokurori, ku nisi procedimi në gjendje të lirë për shtetasit E. P., 36 vjeç, B. H., 25 vjeç dhe A. K., 35 vjeç, pasi 25-vjeçari dyshohet se hodhi sende të forta, në fushë, gjatë ndeshjes së futbollit “FK Partizani-FK Elbasani”, shtetasit A. K. iu gjetën lëndë piroteknike, ndërsa 36-vjeçarit iu gjet një mjet prerës. Sendet që posedoheshin ilegalisht u sekuestruan me cilësinë e provës materiale”, thueht në njoftimin e policisë.
