Ditën e sotme në ambientet e Prokurorisë së Posaçme kundër Krimit dhe Korrupsionit të Organizuar është duke u zhvilluar gjyqi ndaj ish-ministrit të Mbrojtjes, Fatmir Mediu, lidhur me tragjedinë e Gërdecit.
Burime për mediat bëjnë me dije se SPAK ka kërkuar që të pyeten 52 dëshmitarë, ndërkohë më herët mbrojtja e ish-ministrit Mediu kërkoi që në seancë të jenë të pranishëm rreth 90 dëshmitarë.
SPAK ka kërkuar që të japin dëshminë e tyre lidhur me tragjedinë e “Gërdecit” edhe djali i ish-kryeministrit Sali Berisha, Shkëlzen Berisha si dhe ish-ministri i Drejtësisë, Aldo Bumçi.
Ngjarja që lidh Aldo Bumçin me Shkëlzen Berishën, është përmbajtja e letrës nga Ministria e Drejtësisë për kontratën që do të lidhej në Gërdec. Kopja e kësaj kontrate i është dërguar nga zyra e Aldo Bumçit, ish ministër i Drejtësisë, djalit të Berishës, ku lart shkruhej “Për Shkëlzen Berishën”. Faksi është sekuestruar nga Prokuroria në materialet e gjetura pas tragjedisë.
Ndërkohë, këto akuza janë hedhur poshtë si nga djali ish-kryeministrit edhe nga ish-ministri i drejtësisë. I pyetur nga SPAK Bumçi tha se shkrimi është falsifikuar dhe këtë ka bërë denoncim në prokurori asoj kohe, mirëpo ende nuk janë kryer hetimet.
“Qëndrimet e Ministrisë së Drejtësisë dhe të miat si ministër Drejtësie janë të dokumentuara në qëndrimet publike që kemi mbajtur në atë kohë. Në mbledhjen e parë të qeverisë, vendimi i propozuar nga Ministra e Mbrojtës për Gërdecin nuk miratohet. Ministria e Drejtësisë kishte një sërë vërejtjesh dhe nuk miratohet. Vendoset kontakti mes dy ministrive që ato të merrnin parasysh vërejtjet ligjore.
Siç e ka ministria e drejtësisë, e mbrojtjes, e qeverisë përgjigja e dërguar nga ne nuk ka asnjë shënim të tillë. Kjo është me datë. Vendimi është trajtuar në dy mbledhje dhe jo në një. Pasi i kemi çuar Ministria e Mbrojtjes qëndrimin tonë zyrtar se nuk kishim vërejtje, sepse ata i kishin marrë parasysh vërejtjet del një shkresë që ka një shënim në anë për zotin Shkëlzen Berisha. Kjo shkresë është e falsifikuar dhe nuk i qëndron asnjë testi logjik. Ministria e Mbrojtjes e kishte përgjigjen tonë. Nuk kishte nevojë për një shkresë tjetër.
Nëse unë do kisha nevojë të komunikojë me zotin Shkëlzen Berisha do e bëja këta me faks nga Ministria e Mbrojtjes, do e bëja për çfarë? Që nuk kemi vërejtje. Këtë mund ta bësh me telefon, me mesazh, po ti nuk ke nevojë të cosh faks në Ministrinë e Mbrojtjes për zotin Shkëlzen Berisha”, tha Bumçi.
Edhe Shkëlzen Berisha u shpreh se s’ka asnjë lidhje me faksin, teksa pranoi se ka shkuar shpesh në Ministrinë e Drejtësisë se sipas tij ka takuar miq.
“S’kam asnjë lidhje me të. Prokuroria duhet t’i thotë publikut se kush e ka bërë atë shënim. Unë nuk kam asnjë lidhje. Prokuroria t’i thotë publikut se e kujt është kaligrafia, nëse nuk është falsifikim. Që unë të futem në Ministrinë e Drejtësinë nuk do të thotë që unë marr vendime”, ka thënë ai më herët.
