Pas dënimit nga UEFA nga Skënderbeu u largua një numër i madh lojtarësh, por të gjithë duke marrë miratimin e klubit. Por ka edhe braktisje, apo lojtarë që bëjnë sipas kokës së tyre. Bëhet fjalë për mesfushorin nga Mali, Bakari Nimaga, i cili ka firmosur me klubin turk të Ligës së Parë, Hatayspor.
Në Korçë ai kishte rreth dy javë që nuk stërvitej me klubin dhe të gjithë besonin se ai është i dëmtuar. Nuk përjashtohet mundësia që malieni ka bërë me kokën e tij këtë periudhë dhe ka firmosur te turqit pa marrë më parë miratimin e Skënderbeut për këtë transferim. Kështu mund të përkthehet kjo situatë, për më tepër kur mëson reagimin e presidentit të korçarëve, Ardjan Takaj.
I kontaktuar nga “Panorama Sport” pak minuta më parë, ai deklaroi: “Ne si klub nuk jemi në dijeni të kësaj lëvizjeje. Nuk e di se çfarë ka bërë lojtari, por nuk kemi asnjë të dhënë për këtë transferim”. Tashmë mbetet për t’u parë se si do të rrjedhin ngjarjet.
