Laçi merr një fitore me shumë fat përballë Tiranës. Bardheblutë zhvillojnë një ndeshje katastrofike në 25’ minutat e para, ku dy gabime vendos edhe fatin e ndeshjes. Një betejë e vërtetë në Laç mes baltës, pasi fusha e kurbinasve nuk i reziston shiut.
Takimi u zhbllokua që në minutën e 14’ dhe vendasit përfituan mjaft mirë. Një rivënie anësore gjeti Xhixhën të vetëm në zonë, sulmuesi krosoi për Shtubinën dhe shkodrani ishte krejt i vetëm në zonë, duke shënuar qetësisht me kokë.
Një vendosje skandaloze e mbrojtjes së Tiranës, por nuk ishte rastësi. Në minutën e 25-të mbrojtësi Fangaj u nis nga mesfusha dhe u transformua në Maradona, duke shënuar një gol spektakolar, ku natyrisht Tirana bëri sehir.
Në pjesën e dytë Tirana ndryshoi fytyrë, edhe për faktin se trajneri Mema bëri ndryshime, duke larguar Dokën e Karabecin dhe duke aktivizuar Kërçikun e anglezin Ngo’o, i cili rezultoi mjaft i rëndësishëm, sepse fuqizoi ndjeshëm sulmin.
Në minutën e 73-të Ngo’o krijoi rrëmujë në zonën laçiane dhe pasoi për Grecën, i cili u ndal fillimisht nga portieri Selmani, por me portën të boshatisur Hasani shënoi, duke rihapur ndeshjen.
Më pas presion i madh nga Tirana dhe në minutën e 82-të Selmani kreu një pritje fantastike nga Ngo’o, duke mbrojtur avantazhin laçian. Raste të tjera e presion, por asgjë më shumë dhe Laçi fluturon në renditje, ndërsa Tirana mbetet në errësirë dhe me shumë dilema për të ardhmen.
