Më 16 maj 2025, Tirana do të mirëpresë Samitin e gjashtë të Komunitetit Politik Europian (KPE), një ngjarje e rëndësishme që do të mbledhë në një tryezë të përbashkët liderë nga 47 shtete evropiane – përfshirë vendet e BE-së, Ballkanin Perëndimor, Mbretërinë e Bashkuar, Turqinë, Ukrainën dhe të tjera.
Ngjarja do të mbahet në Sheshin Skënderbej, dhe do të kryesohet nga Kryeministri i Shqipërisë. Aktualisht, në shesh po vijojnë punimet për ndërtimin e platformës ku do të qëndrojnë krerët e shteteve pjesëmarrës. Ky është samiti i parë i këtij niveli që mbahet në Shqipëri, duke përfaqësuar një moment historik për vendin. Kryeministri Edi Rama e ka cilësuar si një mundësi për ta vendosur Shqipërinë në vëmendjen ndërkombëtare dhe për të rritur profilin e saj në arenën globale. Për të lehtësuar zhvillimin e samitit, Këshilli i Ministrave ka shpallur datat 15 dhe 16 maj 2025 si ditë pushimi për punonjësit e administratës publike në bashkitë Tiranë, Kamzë, Vorë dhe Krujë – përjashtuar shërbimet esenciale. Gjatë kësaj periudhe, qyteti do të jetë nën masa të shtuara sigurie dhe me kufizime të përkohshme në qarkullim.
Në fokus do të jenë çështjet urgjente, si mbështetja për Ukrainën drejt një paqeje të qëndrueshme, si dhe sfida afatgjata që lidhen me mbrojtjen e proceseve demokratike nga ndërhyrjet e huaja dhe forcimi i kapaciteteve kolektive mbrojtëse të kontinentit
2. Konkurrueshmëria dhe siguria ekonomike
Kjo tryezë do të trajtojë zhvillimin ekonomik përmes inovacionit, ndërtimit të infrastrukturës digjitale, qëndrueshmërisë energjetike dhe autonomisë strategjike për zinxhirët kritikë të furnizimit, duke balancuar qëllimet klimatike me forcën industriale.
3. Emigracioni, lëvizshmëria dhe të rinjtë
Liderët do të diskutojnë për rrugët legale të emigrimit, bashkëpunimin me vendet e origjinës dhe tranzitit, si dhe sfidat që lidhen me ruajtjen e talenteve brenda ekonomive kombëtare. Në qendër do të jetë edhe fuqizimi i të rinjve dhe roli i tyre në një të ardhme të ndikuar nga inteligjenca artificiale dhe ndryshimet teknologjike.
