Tirana është mbushur sot me atmosferë festash me rastin e “Natës së Bardhë”. Në Sheshin Skënderbej po zhvillohet një koncert ku marrin pjesë disa nga emrat më të njohur të muzikës shqiptare.
Koncerti ka nisur nga ora 18:00 dhe do të vijojë deri në mesnatë, ku marrin pjesë artistë si Era Istrefi, Kida, Soni Malaj, Majk dhe Lumi B, të cilët do të sjellin një atmosferë festive në kryeqytet.
Kryeministri Edi Rama ka ndarë në rrjetet sociale video nga koncerti, ku shprehet se Tirana është “pushtuar” nga festa dhe energjia pozitive.
“Tirana sot, ku emrat më të njohur të muzikës po performojnë në Sheshin Skënderbej, duke sjellë atmosferë feste dhe energji fantastike për qytetin,” shkruan Rama.
Më herët gjatë ditës, kryeministri ka publikuar edhe një sërë pamjesh nga aktivitetet e organizuara në qytete të ndryshme të vendit për Ditën e Çlirimit. Një nga momentet ishte festa në Gjirokastër.
Ndërkohë, paraditen e sotme, drejtuesit më të lartë të shtetit zhvilluan homazhe në Varrezat e Dëshmorëve të Kombit në nderim të 81-vjetorit të çlirimit të vendit. Presidenti Bajram Begaj, kryeministri Edi Rama dhe kryeparlamentari Niko Peleshi vendosën kurora me lule në Memorialin “Nëna Shqipëri”, duke përkujtuar sakrificën e atyre që luftuan për liri.
Me koncertin në kryeqytet dhe aktivitetet në të gjithë vendin, kjo mbrëmje pritet të kulmojë festimet e 29 Nëntorit dhe të sjellë një natë të mbushur me argëtim për qytetarët.
