Jemi në prag të dhjetorit, muajit të dritave shumëngjyrëshe, por në Tiranë, ndryshe nga kryeqytetet e tjera të Europës, atmosfera e festave mungon. Kryeqyteti ende nuk është dekoruar plotësisht dhe dritat nuk janë ndezur. Në prag të muajit më të bukur të vitit, që të gjithë e presin me emocion, Tirana duket e zbehtë, pa ngrohtësinë që festat e fundvitit e dhurojnë.
Përgjatë bulevardit dhe në disa nga rrugët kryesore pranë qendrës, dritat janë vendosur, por nuk ndizen në mbrëmje.
Ndërsa godinat e institucioneve, përfshirë ministritë dhe vetë godinën e bashkisë, nuk kanë dekore, si rrallë ndonjëherë në këtë periudhë.
Në sheshin Skënderbej, me shumë vonesë, po punohet për të vendosur pemën e vitit të ri. Ndërsa nuk ka ende asnjë gjurmë punimesh për fshatin festiv, shtëpizat e drurit që prej vitesh janë kthyer në traditë për Tiranën dhe kanë tërhequr qytetarë e turistë të shumtë.
Por përveç atmosferës së krishtlindjeve dhe ndërrimit të viteve, këtë vit kryeqytetit i mungon edhe gjallëria e festave të Nëntorit. Në bulevardin “Dëshmorët e Kombit” janë vendosur vetëm disa flamuj. Bashkia ka organizuar për 28 dhe 29 nëntorin disa aktivitete në zona të ndryshme të kryeqytetit, por Tiranës i mungojnë simbolet kuq e zi, që i japin festës kuptimin e vërtetë të saj.
Ndryshe nga Tirana, kryeqytetet e tjera europiane janë zhytur tashmë në atmosferën e festave. Në Vjenë, tregjet tradicionale të krishtlindjeve janë hapur që në mes të nëntorit, ndërsa rrugët kryesore dhe sheshet ndriçohen me instalacione artistike dhe drita shumëngjyrëshe.
Në Londër, Oxford Street, Regent Street dhe Covent Garden janë ndezur prej javësh, duke krijuar një panoramë festive që tërheq mijëra vizitorë çdo ditë.
Qytete si Parisi, Budapesti dhe Praga i kanë ndezur dekorimet e tyre të vitit që në fillim të nëntorit, duke i kthyer hapësirat publike në atraksion për turistët dhe qytetarët.
Në kontrast me çdo kryeqytet të çdo vendi të Bashkimit Europian ku Shqipëria shpreson të anëtarësohet brenda vitit 2030, Tirana mbetet ende pa shkëlqimin dhe gjallërinë që karakterizon metropolet europiane në këtë periudhë festive… Dhe për shkak të lënies pas dore nga bashkia, kryeqyteti ngjan më shumë si një qytet periferik pa asnjë lidhje me Europën.
