Grupi më i njohur i tifozëve të Kombëtares, “Tifozat Kuq e Zi”, kanë shpallur përmes një reagimi të fortë në rrjetet sociale se nuk do të jenë të pranishëm në ndeshjen e 7 qershorit 2025, duke bojkotuar për herë të dytë në historinë e tyre një përballje të Shqipërisë.
Ata thonë se përjashtimi i tyre vjen jo për shkak të ndonjë ndalese politike, si më 14 tetor 2014 në Serbi, por për shkak të asaj që e quajnë një sistem të manipuluar dhe të padrejtë të shpërndarjes së biletave, i organizuar nga FSHF.
Sipas deklaratës së tyre, sistemi i “shortit” për biletat i shërben më së shumti agjencive turistike dhe interesave të tregut të zi, duke përjashtuar tifozët e devotshëm që ndjekin ekipin kombëtar prej dekadash.
“Ndryshe nga ndeshjet e mëparshme ku anëtarët tanë u organizuan për të siguruar bileta në sektorin tonë tradicional, këtë herë nuk morëm pjesë në farsën e organizuar me pretekstin e një ‘shorti’ të rremë.”
Në mesazhin e tyre, ata denoncojnë rritjen e çmimeve të biletave, të cilat sipas tyre janë bërë të papërballueshme për qytetarët e zakonshëm.
“Futbolli është kthyer nga një aktivitet popullor në një event ekskluziv për të pasurit, ku çmimet e biletave variojnë nga 150 deri në 1000 euro. Është e paimagjinueshme që një familje shqiptare mesatare të duhet të paguajë 600 euro për të ndjekur një ndeshje.”
TKZ e përmbyll reagimin e saj me një mesazh të qartë drejtuar FSHF-së: futbolli nuk është pronë e të pasurve dhe se pavarësisht përjashtimit nga stadiumi, besnikëria ndaj Kombëtares mbetet e pandryshuar.
“Gjithpërfshirja i ka të gjithë brenda përveç se TKZ-në. Aty janë agjencitë e udhëtimit dhe politikanët, por vetëm BESNIKËT e përjetshëm JO.”
Ata përfundojnë me një fjali që vë në dyshim edhe performancën sportive:
“Le të fitojë njëherë Kombëtarja.”
