Presidenti i Kosovës, Hashim Thaçi, mendon njësoj si kryeministri Edi Rama, kur vjen çështja tek bashkimi i dy vendeve, nëse BE ndalon procesin e integrimit të Ballkanit Perëndimor.
Thaçi ka vënë në dukje se Bashkimi Evropian, aktualisht është pa vizion. Sipas tij, nëse BE iu mbyll dyert Shqipërisë dhe Kosovës, atëherë shqiptarëve iu mbetet të bashkohen në një shtet të vetëm.
“Natyrisht, atë që e kam thënë edhe në vitin 2013 e them edhe tani, nëse Bashkimi Evropian e mbyll derën për Kosovën, të gjithë shqiptarët në rajon do të jetojnë në një hapësirë të vetme për t’u integruar pastaj tutje në familjen evropiane”, është shprehur Thaçi, në një intervistë për Evropa e Lirë.
Ai e ka cilësuar Bashkimin Evropian si një bashkësi të ngurtësuar, që ka bllokuar Kosovën në çdo aspekt, veçanërisht në liberalizimin e vizave.
“Natyrisht që qytetarët e Kosovës janë të frustruar me Bashkimin Evropian, me ngurtësinë e tyre, me bllokadën e tyre dhe padrejtësinë dhe ndëshkimin që po u bëhet qytetarëve të Kosovës për procesin e liberalizimit të vizave, sepse Kosova ka përmbyllur të gjitha kriteret e nevojshme dhe të domosdoshme dhe krejtësisht me të padrejtë e ka vënë edhe çështjen e demarkacionit”, ka thënë më tej presidenti i Kosovës.
Ndërkohë, kryeministri i Kosovës, Isa Mustafa, i ka cilësuar si populiste deklaratat e homologut të tij nga Tirana, Edi Rama.
Në një intervistë për “KTV”, ai është shprehur se Kosova nuk synon bashkim tjetër, veç BE-së. “Ne nuk e kemi orientimin që të bëjmë bashkime tjera, përveç Bashkimit Evropian. Edhe nëse s’na pranojnë për dere, do të hyjmë për dritareje”, ka theksuar ai.
Deklaratat e kryeministri Edi Rama u shoqëruan me kritika të ashpra nga eksponentët politikë në Beograd, të cilët theksuan se po kërcënohet paqja në rajon. Sipas tyre, Kosova me Shqipërinë mund të bashkohet vetëm përmes luftës. Për këtë arsye, ata kërkuan reagimin e Bashkimit Evropian. Vetë BE-ja, përmes zëdhënëses së Komisionit Evropian, Maja Koçijançiç, bëri apel që palët të ruajnë fqinjësinë e mirë, sepse një ditë do të jenë pjesë e unionit.
